專訪｜伍富橋與富貴老婆新聞台相識印象差：唔係正常女仔 認「億萬駙馬」形容貼切《超級巨聲4》出身的伍富橋（Alvin）自從與富家女友梁兆楹（Shirley）結婚後，與 「億萬駙馬」之名結下不解緣，儘管流言蜚語充滿負評，但伍富橋卻未有感到難受：「起碼比嗰陣多人認識咗，咁『駙馬』呢個字又有女婿嘅意思，對我嚟講覺得又冇講錯。」在伍富橋的眼中，太太竟然豪氣又白癡！攝影：譚志光 記者：Grace Ho伍富橋早前趁着兩人結婚一周年，推出新歌《很多很多份之一》，日前接受《星島頭條》的訪問，談及夫婦二人相識經過，古語有云「無仇不成父子，無怨不成夫妻」，因為性格累事，令伍富橋在相識初期留有不良印象：「我哋喺娛樂新聞台就認識，佢有交過啲VO畀我錄，不過嗰陣我個人冇乜自信，又內歛，成日都避開人哋嘅眼神，更加冇同佢打招呼，所以佢對我嘅印象好差，覺得我冇禮貌！」亦因為兩人欠缺交流，伍富橋直言對太太冇印象：「只係記得有個咁嘅同事，直到有朋友帶咗佢嚟我嘅健身室，先係真正認識、開始有印象。嗰陣覺得佢比一般女仔man，好豪氣，同其他女仔唔同，唔係一個正常女仔。」伍富橋婚後變得樂觀和開心咗，多謝太太在網上po自己無厘頭一面，令人留意原來有個咁樣人。結果兩人一拍即合，伍富橋認定了對方成終身伴侶：「我冇諗過喺印象咁差嘅情況下，最後竟然可以喺埋一齊，仲成為我太太。佢最吸引嘅主要係性格，一來佢係好man，二來有陣時又好白癡，man嘅時候係可能我遇到啲難題，或者我唔開心嘅時候，佢同我分析，會畀到一啲我諗唔到嘅意見，又或者我睇一件事都只會喺一個角度睇，但係佢會教我喺另一個角度睇，甚至有人做咗啲嘢令到我好嬲，咁佢都會講某程度上我都做咗啲嘢唔啱，所以先會令人咁樣做，佢會令到我去反思。」【點擊睇伍富橋照片】：伍富橋稱太太出現，令自己人生完整咗，下一步是將事業發展更好。伍富橋希望有自己的小朋友，所以同時發展健身事業，令家人有保障。伍富橋稱現時心態很好，沒有再出現迷惘！伍富橋稱自己是富二代，只不過經濟沒有負擔，是一個可以自給自足生活的人！伍富橋稱自己未有失意情況出現，因他未有得意過，所以未算係好失意。伍富橋續說：「呢啲點點滴滴，都會令到我成長，變得成熟，可以係呢一世都一齊嘅人。不過佢除咗做正經嘢嘅時候好正常，其他時間都係好白癡，好似前排有個網民留言話我太太個樣生得好搞笑，佢睇完之後都喺度狂笑，跟住話自己個樣都生得好搞笑，呢啲嘢會令到我覺得佢好得意，所以我更加鍾意呢個女仔。」伍富橋專訪｜性格內歛惹人誤會在整個訪問上，伍富橋多次感激太太改變他的性格，又感激太太令他的人生更加完整：「可能我係巨蟹座，成日會諗啲無謂嘢，好似對住啲前輩，如果嘻嘻哈哈打招呼，人哋又唔知會點睇我，如果我同人打招呼，萬一人哋唔睬我，又會唔會好尷尬，諗吓諗吓不如扮見唔到，所以會有好多誤解，以為好寸。」伍富橋笑言：「而家好多朋友話我嘅性格開朗咗好多，同你講嘢起碼夠膽望住你隻眼，呢啲以前唔會。我都好響往而家嘅狀況，有自己嘅家庭，有另一半，呢樣都係好憧憬嘅一樣嘢，我本身係一個比較傳統嘅人，家庭觀念都好重，唔希望太遲先結婚，大家都覺得結婚係要喺最愛嘅時候做，咁樣先係最好，所以咪有呢個決定，先結婚、後拍拖。」伍富橋新歌MV女主角由杜以辰擔任。伍富橋專訪｜不是富二代？不過入行初期，伍富橋一度被認定是「富二代」，周身名牌且出入揸靚車，但戀上太太後，情況出現了逆轉，變成靠老婆的「億萬駙馬」。他笑說：「我又未覺得算係負面，又唔覺得唔好，起碼比嗰陣多人認識咗，咁駙馬呢個字又有女婿嘅意思，對我嚟講，覺得又冇講錯。其實我只係小康之家，話我係富二代係因為我揸Tesla。我嗰部又唔係百幾萬嗰啲，其實都只係一架代步嘅車。」到了現在，伍富橋更加冷待所有流言蜚語：「其實結咗婚，點會分老婆畀定老公，都係大家嘅錢，如果財政獨立，不如拍拖喇，我唔會怪外界點樣睇同諗，佢哋唔識我本人，唔知道實際情況，所以佢哋點寫，睇咗就算。」他還說：「就算逐點澄清，佢哋都會周圍去講，無謂中伏，佢哋只係想辣㷫你啫，如果出PO有人留言 ，我同太太會like但係唔會留言，太太有時都會認同啲網民係咁潤我，話係㗎喇，食得鹹魚抵得渴，所以我哋對於網民嘅批評都冇乜嘢，佢哋點講都好，我哋都會酒照飲，舞照跳，唔會影響到我哋。」數數伍富橋入行將近10年，可惜機會未算多，佳作亦只曇花一現，曾自覺出現迷惘期而鬱鬱不得志：「嗰陣會問自己點解冇人留意我，但係我而家睇番所有嘢都係整定，冇得強求，尤其係觀眾緣，唔係想要就有，而且機遇亦都係，唔係你就唔係你，而家諗得好開，最緊要生活到，有完整嘅家庭，同外父外母生活得開心就得。」提到外父外母，伍富橋有一絲愧疚：「我哋冇好正面講啲新聞，佢哋明白有啲係誇張咗，但係我自己有啲愧疚，好似無端端拉咗佢哋承受呢啲壓力，會有啲唔開心同虧欠，好彩好佢哋體諒，明白係工作嘅一部份，我每日都有自己嘅工作，有搵錢返屋企，太太本身搵幾多，屋企家底有幾多，呢啲唔到我控制，總之我有做一個男人、做人老公同做人女婿要做嘅嘢就己經夠。」伍富橋與太太經常分享生活照。（伍富橋IG圖片）伍富橋專訪｜老婆親手毀滅包袱 不過凡事有兩面睇，抱得美人歸固之然開心，伍富橋亦因此看清楚身邊人：「冇諗過一啲我以為好好嘅朋友， 好兄弟，知道我發生呢件事，會用估唔到嘅角度去睇我，令到我睇清身邊嘅人，邊啲先係我真正嘅朋友，邊啲係計算緊我嘅人。」他還說：「我又試過同啲好耐冇見嘅朋友食飯，佢哋會話『你仲記得我㗎咩？』， 仲話我『扮豬食老虎扮單純』，特登埋我老婆身，呢啲係喺好close朋友口中講出嚟，我唔明點解會咁，如果係真嘅朋友，應該有祝福而唔係踩，除非你覺得佢另一半真係有問題，對人有害咪會講，如果唔係會祝福佢，令到我上咗一堂。」而伍富橋太太亦戥老公不值，試過在社交平台出po透露老公被好友誤解而鬱鬱寡歡，更為老公抱不平：「謠言止於智者，你問得出呢個問題，好明顯你就係其中一位造謠者。」對於太太的支持，伍富橋在訪問亦有說：「發生咗呢啲事，我有話俾佢聽，佢係會擔心多啲，可能佢成長背景，遇到呢啲事比較多，經驗多過我，佢對呢啲嘢冇乜感覺，有陣時仲會安慰返我『你又冇偷有冇搶，又冇做犯法嘢？有冇傷害人？如果冇就唔好理呢啲人，你而家好得閒呀！』」講起出post，伍富橋笑說：「以前我只係會擺chok同靚仔嘅一面，但係太太反而將啲無厘頭嘢擺咗上網 ，點知反應仲好過以前，多咗人會留意，先知有個咁樣嘅人，睇最真嘅人，徹底毀滅咗偶像包袱，不過咁樣仲好，多謝佢，將我開心一面擺咗出嚟，唔係好難搞！」伍富桥
2023年6月9日 星期五
專訪｜伍富橋與富貴老婆新聞台相識印象差：唔係正常女仔 認「億萬駙馬」形容貼切 #女神
