星岛网：廖慧仪首开腔曾抑鬱:喺屋企係咁喊 感情瓜葛形象插水"雪"足一年
前落选港姐廖慧仪（Jessica）最近在主持的J2旅游节目《趁而家去大马偷食…谱！》中换上低胸装，又狂晒长腿及24吋纤腰，甚受巴打欢迎。从2020年参选港姐到变身"J2女神"，26岁的Jessica曾有段黑暗日子，跟孔德贤传绯闻，旧爱Sam疑为情困轻生，自此打入冷宫，去年尾终获解冻再现幕前，强调自己都唔好过的Jessica为自己平反："我抗拒乱搞男女关係。"
採访：方骞平 摄影：邓国良 场地：hotel icon the market
作为瑜伽导师的廖慧仪三围35C、24、34，超Fit身形唔怕露，在J2全新旅游节目中着紧身小背心晒深坑事业线，忍唔住一睇再睇。在公已经如此大方，在私更加不得了，社交网内有八成相片都全方位晒完美曲线，泳衣、瑜伽衫、运动紧身小背心，梗有一款啱你心意。
她坦言有唔少网友DM要求交友，又话喜欢她："我觉得呢啲係友善表现，不过都试过收到一啲不雅相，男人性器官、做gym相…我睇完大笑冇回覆，呢个世界真係有好多搞笑嘅人，佢咪send嚟囉，又唔觉係骚扰嘅，反正我无聊先会睇吓。"
Jessica 自爆甚至有人提出"包养"："经验之谈，尤其係艺人好容易畀人改图，所以唔理就係最好嘅处理方法。加上疫情下网骗案好多，成日接到电话'係咪阿…呀？'网上世界好多假嘅，唔好咁认真。"
解冻后好多嘢做
因为感情瓜葛，形象插水遭无綫"雪"足一年的Jessica愈嚟愈多机会，除做过真人show《港女野人》主持外，刚客串拍新剧《夺命提示》。目前是TVB娱乐新闻台主播，稍后挑战连续60小时不眠不休的《我要瞓斗》。
Jessica自言好期待："因为赢咗有总值10万蚊奖金奖品，但最怕只係有眼眼圈。"谈及跟前辈刘佩玥拍《夺》剧压力较大："本身剧本写我係打沙包，点知现场改咗对打，几惊错手打亲佢。"
多谢C君令她重生
Jessica好感激前J2创意总监C君"执"她返去做《港女野人》令她重生，从中能调节心理，做返个正常人。对于两年前旧爱离世事件，Jessica首度开腔剖白："其实事发后我冇担心过仲可唔可以继续喺娱乐圈发展，反而关注心理健康问题，因为当时情绪唔稳定出现抑鬱，喺屋企係咁喊，抗拒接触人，身心都有障碍，只係你哋睇唔到我个伤口。"
Jessica父母和好友都好肉赤她，认为她只得23岁，唔应该面对如此困境，承受咁大压力，"爸妈仲提出'随时可以移民，唔做呢行…'"虽然Jessica有睇专科医生寻求协助，但最后都係靠自己行出嚟，主持《港女》迫自己面对镜头："好记得拍完第一日我忍唔住爆喊发洩话'好耐未试过有咁多人望住我，我好惊呀…'睇返嗰时状态仲係唔OK。"
不吐不快闹爆改图
单身的Jessica唔想有咁大压力，拒同男艺人拍拖，见过鬼怕黑亦会小心处理感情问题："做艺人要小心啲，就算出席朋友嘅生日活动，都要睇吓有乜人一齐去，始终唔太方便。"问到爱情观？她坦率说："我唔係老，唔使收敛作风，缘份嚟唔抗拒拍拖，但抗拒乱搞男女关係。"
经一事长一智，Jessica除会慎言，亦唔怕辛苦做多啲，求有稳定收入，另外想拍剧及喺铜锣湾大萤幕见到自己，畀父母睇到个女真係艺人。最后她不吐不快："有啲嘢我冇讲过，但会被改图搞到完全相反，做艺人好多时真係解释唔到…𠵱家我个人冷静到都几得人惊，好似冇晒感觉咁。"
