星岛网：蒋祖曼晒命有老公煮饭等收工 见证张頴康由百厌仔变顾家好爸爸
蒋祖曼（Joman）在剧集《法言人》中饰演铁面无私，外表冷傲的"钉官"，跟演律师的张頴康"翁雄"CP成功入屋。两人早于15年前拍电影《围城》已结缘，见证对方成长的Joman笑住踼爆张頴康："以前佢好百厌，古灵精怪咁，𠵱家个人阳光咗。"Joman坦言亦有幸福家庭做最强后盾。
採访：方骞平 摄影：邓国良
蒋祖曼拍《法言人》最难顶要面对搞笑对手张頴康，搞到她经常笑出声，"拍拖手过马路重点戏，本身係好浪漫，戏外佢係咁引我笑，对住佢个样真係拍得好'辛苦'，另一场戏去农庄取景，阿康竟然带埋高尔夫球棍嚟，话要试吓啲草皮好唔好，佢真搞笑。"
Joman大讚阿康係好好先生，见他有个美满家庭亦好欣慰。而Joman与电影幕后陈卓麒结婚近10年，两公婆无声胜有声："老公唔浪漫，亦唔係好讲嘢，但作为行内人明白到大家做紧乜，精神上支持已好ok，我开工时佢会keep住煮饭我食，(无微不至呀)ok啦…哈！人就係咁(身在福中不知福)。反而妹妹可可係我忠粉，会等睇我嘅戏。"
唔反对继子入行
至于哥哥Day仔(已故前妻所生)快将18岁："青少年有自己一套睇法，只要佢搵到自己锺意嘅嘢，知道自己做紧乜，我都会支持佢。"她指Day仔係学校剧社成员，又学紧乐器，问到可会反对继子入行？Joman持开明态度："绝对唔会，如果佢真係感兴趣，我仲会带佢视察吓呢行环境，了解吓拍嘢流程，但我一定唔会帮佢安排机会，其实做乜嘢最后都要靠返自己，要努力争取机会，佢见我拍嘢都知道做艺人好辛苦。"
