【新劇拜神】
法言人｜馬國明演師爺背法律術語勁痛苦 林夏薇買定合桃進補
馬國明曾多次出演大夫、醫生嘅角色，次數可媲美做過晒警署各大部門嘅「御用警察」吳卓羲。喺新劇《法言人》中，佢繼續係做專業人士——師爺，而林夏薇、黃嘉樂就將會飾演律師，其實馬明14年前曾在《律政新人王II》中飾演律師，今次做師爺，他笑言係被降職。「因為劇中我年輕時被人屈使黑錢，所以無辦法做到律師。但我喺戲中好八面玲瓏，因為律師唔可以自己出去搵生意，要靠我，所以我先係律師樓嘅財政支柱。」
劇中由於有不少專業術語對白，所以林夏薇都話要準備定合桃進補。馬明亦補充表示：「我地就算喺辦公室討論案情，都有好多術語要講，真係有好漫長嘅路要走。」馬明之所以話漫長路，相信係因為劇集要拍到明年3年，變相今年嘅聖誕要在工作中渡過。「因為佢（湯洛雯）都開緊《隱門》，大家都有共識，唯有睇下開工前後有冇得見到。」
另外，提到獲熱捧為《萬千星輝頒獎典禮2021》「最佳女主角」大熱人選，林夏薇就話本來都冇諗太多。「近排愈多愈多路人過嚟同我講加油，我就會……反而係好驚佢哋失望，而會開始緊張，而家同視帝一齊開工，希望佢今年錦上添花之餘，都可以比啲luck我。」馬明在旁表示睇好林夏薇，但亦笑言自已有幾位心水人選。「但激烈先好玩，如果一個玩又好似冇咩癮咁。同埋好似佢所講，觀眾鍾意你個角色已經係成功。」
黃嘉樂入行20年終發圍 首次擔正：第一次聽到係喜極而泣
加入TVB剛好20年嘅黃嘉樂，喺新劇《法言人》中首次擔正做主角，今午（17日）在劇集拜神儀式上，與馬國明、林夏薇、張頴康並列。黃嘉樂接受訪問時透露在劇中飾演「高富帥」事務律師，打工純粹為幫朋友。「我喺劇中高IQ、但做嘢無心裝載，不過會為朋友兩協插刀。」黃嘉樂表示過往都做過律師、醫生的專業角色，但今次監製要求他講對白時快狠準，所以有一定難度，幸好其角色亦帶點歡樂，所以拍攝時十分愉快。
加入TVB 20年，終獲擔正機會，對於本月生日嘅黃嘉樂嚟講，絕對係最好嘅生日禮物，他說：「好多謝嘉豪哥比呢個咁好嘅機會我。因為幸福嚟得太突然，我知道自己會開劇，但佢哋一直冇透露我做咩，直到我去開會時，佢哋先話呢個角色搵咗我做，當時聽到係喜極而泣。因為我從來都無話過要放棄行上去，但要等機會，咁今次家豪哥俾咗個好好嘅機會我。」由於機會來得不易，嘉樂表示會好好珍惜。
